करसान्नी बुनियादी-ढांचा फंड केंदरी मंत्रीमंडल ने जुलाई 2020 गी करसान्नी बुनियादी-ढांचा फंड आक्खी जाने आह्ली इक नमीं कुल भारती केंदरी कारज-खेत्तर योजना गी मंजूरी दित्ती ऐ। इस योजना च फसल दे बाद प्रबंधन बुनियादी-ढांचा ते फसल प्रबंधन समुदायक करसान्नी संपत्ति लेई ब्याज सब्सिडी ते माली मदाद दे राहें ब्यहारक योजनाएं च निवेश लेई इक मध्यम लम्मी मेयाद आह्ली कर्ज देने दी स्हूलत दस्तयाब करोआई जाह्ग। योजना दी मेयाद माली ब’रे 2020 थमां माली ब’रे 2029 (10 ब’रे) तगर होग। लोड़चदे लाभार्थी इस योजना च बैंकें ते माली संस्थानें आसेआ प्राइमरी करसान्नी साख कमेटियें (पीएसीएस), तजारती सैह्कारी कमेटियें, करसान उत्पादक संगठनें (एफपीओ), खुद मदाद समूह् (एसएचजी), करसानें, सांझें देनदार समूहें (जेएलजी), बहुउद्देशी सैह्कारी कमेटियें, करसान उद्यमियें, स्टार्टअप, केंदरी/राज्य संगठन जां मकामी संस्था आसेआ प्रायोजत सावजनक निजी हिस्सेदारी आह्ली योजनाएं ते कठेरीकरण बुनियादी-ढांचा देने आह्लें गी कर्ज दे रूप च इक लक्ख करोड़ दस्तयाब करोआया जाह्ग। थ्होने आह्ले लाह् · इस माली स्हूलत च 2 करोड़ दी सीमा तगर दे सभनें कर्जें पर 3 फीसद प्रति ब’रे दी ब्याज सब्सिडी थ्होग। सब्सिडी बद्धोबद्ध 7 ब’रें लेई दस्तयाब रौह्ग। · एह्दे अलावा क्रेडिट गारंटी कवरेज सूख्म ते लौह्के उद्योगें लेई क्रिट गारंटी कवरेड फंड ट्रस्ट (CGTMSE) योजना दे अंतर्गत 2 करोड़ दी सीमा तगर दे कर्ज पर साख गारंटी कवरेज जोगता हासल कर्जधारकें लेई दस्तयाब होग। इस कवरेज लेई फीस दा भुगतान सरकार आसेआ कीता जाह्ग। · एफपीओ दे मामले च करसान्नी, सैहयोग ते करसान कल्याण विभाग (डीएसीएफडब्लूय) गी एफपीओ हौसला हफजाई योजना दे तैह्त बनाई गेई स्हूलत थमां क्रेडिट गारंटी दा लाह् हासल कीता जाई सकदा ऐ। · इस माली मदाद स्हूलत दे अंतर्गत मुड़-भुगतान लेई स्थगत घट्टोघट्ट 6 म्हीने ते बद्धोबद्ध 2 ब’रें दे अंदर होई सकदा ऐ।